Энэ л өдөр унших шүлгүүдээс...
Дарс ч дэргэд нь ус шиг санагдах
халуухан сэтгэл минийх
Дайн ч дэргэд нь энх санагдах
хатуухан тавилан минийх
Далай ч дэргэд нь гүехэн санагдах
тэр агуу сэтгэл минийх
Даянд ганцхан төрсөн хорвоогийн
тэр дурлал минийх
***
Нууцхан шөнийн эзэн минь
чи над руу ирэхдээ
Нулимс биш хайр биш жаргал
авчирдгийг чинь би мэднэ
Нуурлаад үерлэсэн их амьдралын
жамыг сөрж
Нуугдан уйлж, нууцлан хайрласныг
минь чи мэднэ
Мянга мянган шөнө чи минь
зүүдэнд минь минийх байхаар
Мартагдашгүй ганцхан өдөр зүрхэнд
минь хамт байгаач
Зуу зуун шөнө чи минь зүүдэнд
хамт жаргахаар
Зуурхан түрхэн ч болов зүрхэнд
минь минийх байгаач
Хэнэггүй явсан замд чинь би
чамтай учрахад
Хэнзэлж ургасан хайр зүрхэнд чинь
хоцорсон уу, хэлээч
* * *
Хурц шаргал нар толгой дээрээс цохиж
Хурдлаарай хэмээн намайг яаруулна
Чам руу алхах замыг минь гэрэлтүүлж
Чухал үгийг цээжинд минь бичиж хөтөлнө
* * *
