Санаж л явна даа, та нарыгаа.... (Алсын Америкаас...)

Сайн байцгаана уу, миний хөөрхөн найз нар аа!
Нэг л мэдэхэд цаг хугацаа харвасан сум мэт нисэн өнгөрч, сургууль төгсөөд, хонхны баяраа хийгээд, уйлалдаад салж байснаас хойш 23 жил өнгөрчээ. Энэ богинохон ч юм шиг хэрнээ хүний амьдралын бүхэл бүтэн нэг үеийг өнгөрөөхдөө найз нь хорвоогийн эрээн бараантай амьдралыг бүгдийг нь туулж мэдэрлээ. Би нэг л юмыг маш сайн ойлгож байна: хүнд хамгийн нандин үнэ цэнэтэй юм бол эцэг эх, үр хүүхдээс минь гадна, хэзээ ч олдошгүй багын минь найзууд юм байна гэдгийг. Магадгүй, та нар минь нутаг орондоо элэг бүтэн амьдралтай, бас хааяа ч гэсэн хэдэн биенийгээ хараад явдаг болохоор багын найз нараараа дутаж, тэднийгээ санан үгүйлж явахын зовлонг тэр бүр мэдрэхгүй л яваа байх. Энд ирсээр найз нь нэг л мэдэхэд 9 жил болчихжээ. Хүний газар бишгүй л юм үзэж явахдаа муу найз нараараа их л дутаж, дотор минь өмөрч явна даа... Би та нартайгаа байхдаа өөрийхөөрөө инээж хөхөрч, бас уйлж галзуурч, хамгаас илүү аз жаргалтай байж чаддаг. Энд бол жоохон л юм ярих гэхээр "онгироо" нэр зүүчих гээд, дуулж чанга чанга инээхээр "галзуу авгай" мэт харагдчих гээд доторхоо ч нээж чадахгүй битүүрч явсаар бэтгэрч үхэхнээ, найз нь... Би та нараараа бахархдаг шүү. Хаана ч явсан манай ангийхан гээд шал танихгүй хүмүүст та нарыгаа ярьчихсан л цохиж явдаг. Энд танилцсан цөөн хэдэн найз нар маань Петька, Васька, Чавка, Анька гээд онигооны гол баатруудыг бол андахгүй шүү дээ... Би ер нь хөгшрөхгүй мэт санаж, хэдэн муу найз нараа мөнхийн юм шиг бодож явждээ... Талийгаач Жиймаагаа өнгөрөөд, Энкүшийгээ өвдөөд ирэнгүүт өөрийн эрхгүй та нарыгаа улам их санаж, ер нь ангийн гурвалжны хурц өнцгийн ажлаа сайн хийж, та нарыгаа уулзуулж, учруулж, харилцаа холбоог нь сэргээхгүй бол болохгүй нь гэж бодлоо. 5б гэдэг анги хэзээ ч тарж бутрах ёсгүй. Үхэн үхтлээ бид холбоотой байж, бидний үр хүүхэд, хойч үед минь бидний нөхөрлөл үлгэр жишээ болж явах учиртай гэж бодогдсон юмаа. Биднийг уулзуулж, санасан сэтгэлийг минь дэвтээх энэхүү блогийг нээх санаачлага гаргасан ангийн дарга Баяраадаа, мөн бидний блогийг ажиллуулж байгаа компьютерийн мастер Петькадаа хувиасаа болон найз нарынхаа өмнөөс чин сэтгэлийн талархал илэрхийлье! Мөн намайг энд байхад надтай үргэлж холбоотой байж, сэтгэлийн дэм, урам хайрладаг, эрч хүч өгдөг найз нартаа баярлаж явдагаа илэрхийлэхийн ялдамд "Та нартаа хязгааргүй хайртай шүү!" гэдгээ дахин дахин хэлмээр байнаа. Энэ блогоо цаашид улам өргөжүүлэхийн тулд хүн бүр идэвхтэй оролцож, гэр бүлийнхээ зурагнууд болон танилцуулгаа, мөн сэтгэгдлээ Петька руу илгээгээрэй. Бид ангийн фото альбом болон өөр олон сайхан зүйлс хийхээр төлөвлөөд байгаа.
Удахгүй та нарыгаа тэврэн уулзахын өлзийтэй ерөөл дэвшүүлэн, мэхийн мэндчилсэн муу найз Сайхнаа /Вовка/ тань /ангийн гурвалжны хурц өнцөг/
2011 оны 5-р сарын 10 Чикаго хот.